مدرسة التجاريين ومدرسة الطبيعيين

اليوم هنتعرف علي مدرستين اقتصاديتين كانوا موجودين في فتره الحداثة المبكرة اللي هما مدرسة التجاريين ومدرسة الطبيعيين وهنتعرف برضه علي الأوضاع السياسية والاجتماعية والاقتصادية اللي ادت لظهور المدارس دي واللي ادت لتطورها

واحده من المدارس اللي ظهرت في فتره الحداثة المبكره هي مدرسة الاقتصاديين التجاريين واللي ظهرت خلال القرن ال 15 لحد القرن 18، كانوا بيؤمنوا بمجموعه من المفاهيم والأفكار الاقتصادية وكانوا برضوا متأثرين بالأوضاع

اللي كانت بتحصل ساعتها

يعني علي سبيل المثال كانوا بيؤمنوا ان الدولة لازم تكون قوية، وان الدولة بتستمد قوتها من الذهب والفضه او الثروة اللي عندها، وكانت بتؤمن بإن عشان دولة تبقي اقوى او اغني لازم دولة تانية تبقي افقر او اضعف

علي سبيل المثال نفترض ان العالم ده فيه شخصين ، وان الثروات اللي في العالم كله 10 جنيه، واحد معاه 6 جنيه وانا معايا 4، ده معناه ان فيه شخص اقوى واغني وواحد افقر واضعف

غير كده كمان كان دايما التجار هما صحاب الدولة ، عشان التجار دول هما اللي بيجيبوا فلوس للدولة ، وهي دي فكره الميزان التجاري ، ان بعد تجاره ما بين الداخل والخارج لازم تحقق فائض عشان تبقي أقوى

غير كده كمان هنلاقي ان الوضع ده كله كان بيشجع الدول الأوروبيــة انها تستعمر الدول التانيه عشان تخش المناجم وتجيب الدهب والفضه وعشان يبقي عندها وصول للأسواق التانيه اللي تقدر تتاجر معاها

باختصار شديد المدرسة التانية هي مدرسة الطبيعين ومؤسسها هو فرانسوا كيناي من فرنسا، وكانوا بيؤمنوا ان الزراعه هي النشاط الرئيسي لأي اقتصاد واللي من خلالها ممكن تطلع مواد ممكن تستخدم في اي انتاج

اهميه مدرسة الطبيعين هي انها مهدت الطريق للمدرسة الكلاسيكيه اللي هنعرفها فيما بعد