التحيز فى العلم

اليوم ممكن يكون كلامنا مختلف شوية بس من خلال الكلام هنعرف يعني ايـه نظرية ويعني ايه تحيّز وأهميه ان احنا نكتشف التحيّز ده وازاي نكتشفه

الكلام انهارده ممكن يكون فيه فلسفه كتير وتحس ان فيه كلام مكلكع وممكن متفهموش منها اي حاجه بس لو ركزتوا في الكلام كويس هتحسوا ان الموضوع مش موضوع اقتصاد وبس وان فيه جوانب كتيرمن الحياة اتفتحت لكوا وهتشوفوا الحياه بمنظور عمركوا مكنتوا بتشوفوه قبل كده

النهارده هنفهم يعني ايـه تحيّز ، والتحيّز موجود في كل حته حوالينا وبالذات في العلم ، لما نيجي نبص علي التقدم العلمي اللي حصلوا في ال 100 سنه اللي فاتوا هنلاقي أن هو تقدم مذهل مقارنا بال 100 سنه اللي قبلهم ولو روحنا رجعنا بالتاريخ لحد عايش من 100 سنه وقولناله تخيل كده العالم هيكون عامل ازاي بعد 100 سنه ؟؟

يعني النهارده ، تعتقدوا ان هو كان هيقولي اني ممكن اكلم صاحبي اللي على بعد 10 ألاف كيلو صوت وصورة ، او مثلا هيكون فيه مخترع زي مخترع Google او Facebook او Microsoft هتكون من أهم الأختراعات اللي غيرت حياه البشر او هتكون غيرت طريقة تفكيرهم ، اكيد طبعا اجابه السؤال ده هتكون صعبه جدا .. بس احنا بنحاول نبص علي التقدم العلمي اللي حصل في الفتره اللي فاتت دي

وحصل برضه تقدم علمي مش بس في الأنترنت والكومبيوتر ، ده حصل في الهندسة وفي الصناعه وفي الطب وغيرها وغيرها ..

بس أكيد رد الراجل مش هيكون ليه دعوة خالص بالواقع وده مش عشان هو غير متعلم او متخلف ، بس ده لأنه كان عايش حياه مختلفه تماما وفيها حصان كوسيله مواصلات ومفيش موبايلات ولا حتى ردار ، اكيد كان متأثر بالمشاعر والأفكار السائده ساعتها

واحنا كمان ممكن نبقي عاملين زي الراجل ده لو حد جه سألنا تخيل العالم هيبقي شكله عامل ازاي كمان 100 سنه هنقول له ان windows8 او i phone او او ..... هما قمه التكنولوجيا اللي احنا بنستخدمها وهنبني علي اساسها تخيلنا للمستقبل وده "التحيّز" أنك تبني أفكارك ومعتقداتك على اللي انت بتشوفه حواليك

التحيّز موجود في كل حته حوالينا ، خليني اضرب لكوا مثال من التاريخ ايام الأمبراطورية الرومانية "في ايطاليا دلوقتي" وقتها كان فكره العبيد فكره سائده وكل الناس مؤمنين بيها ومسلمين بيها واي حد يخرج عن ده يبقي غير طبيعي ، جه واحد اسمه سبارتكوس "مشهور بإنه محرر العبيد ، جمع مجموعه من العبيد وحاولوا يعملوا ثورة

ولكن للأسف الثورة دي فشلت ، وقتها سبارتكوس كان بيآمن وبينادي بإنه لازم يبقي زيه زي اى حد عايش في الأمبراطورية الرومانية ، طبعا ان هو يلاقي حد يقول الكلام ده الأمبراطورية الرومانية طحنته

مثال تاني حدث في مصر ، ايام ثورة 25 يناير لو كنت فتحت التلفزيون ، كنت هتلاقي كوبري قصر النيل فاضي ، لو قلبت التلفزيون هتلاقي ميدان التحرير فيه ملايين هو ده التحيّز ..

انك تبقي منحاز لفكره بغض النظر عن صح او غلط ، التحيّز حاجه حتمية يعني هتحصل وافقنا بيها او موافقناش . والتحيّز موجود بدرجه كبيره في في العلم ، فهنلاقي ان العلماء اللي حطوا نظريات كانوا متأثرين جدا بالأفكار والمشاعر و الأوضاع اللي كانت سائده وقتها وهنا بتيجي الخطورة، اننا لما نيجي نبص علي نظرية منبصش علي الأوضاع اللي طلعت فيها النظرية وعلي الحاجات اللي كانت مأثره علي اللي حط النظرية

لازم لما نيجي نبص لأي علم او لأي منهج او لأي فكر نحاول نبص علي الأوضاع دي ، ونجردها علي العلم نفسه عشان نعرف نشيل الأنحياز من العلم

قولولنـا بقي يـا تري ايه أكتر الحاجات اللي بتشوفوا فيها الأنحياز